Euskaraz abesten duen talde on bat aurkitu ezinik, metal melodikoaren jarraitzaileok
bageneukan aspaldidanik barnean hutsune bat. Diabulus
in Musica eta Tight Leash
bezalako taldeek urteotan langa garai utzi badute ere, ingelesa dute mintzo.
Hala
ere, badirudi iluntasun garaia argitzeko esperantza badagoela. Izan ere, Taupada talde gipuzkoarra itxaropentsu
agertu da Zeren Zain estreinako
lanarekin. Eskandinaviarren aitzinean paparra erakutsi, eta harro egoteko
garaia iritsi zaigulakoan gaude.
Delain talde holandarraren ahotsak gehitu iezazkiozu
bertoko Asgarth mitikoari, eta hara
non erdietsiko duzun letra sorginduak eta doinu itsaskorrak uztartu dituen
talde urretxuarra.
Genero-barietate zabaleko datozkigu, balada lasaietatik
erritmo ilun eta sakonagoetara. Gainera, eskuzabal agertu zaizkigu, eta Zeren Zain musutruk lor dezakezue hemen klik eginda.
Entzungo duzuenez, kalitatea darien 9 kantu fresko eta helduk osatzen dute lana, behin eta berriro
entzutekoak guztiak. Amets Krudelakek ematen
dio hasiera lanari. Diskoan nagusi diren gitarra eta baterien ikur, pasarte
itsaskor eta ederrak eskaintzen ditu.
Oroitzapenakek ere duintasunez heltzen dio lekukoari.
Ilunxeagoa da, eta Lauraren ahots
liriko hunkigarriak bikain daude txertatuta. Nire errealitatea da diskoan
aurkituko dugun lehen balada, estribillo ederrekoa. Bestalde, izenak dioen bezala, Herri Sorginduakek aztikeria garaietara gidatzen du entzulea, eta
aipatzekoa da duen bukaera.
Baretasuna Oroitzapenaken
antzeko da, arinagoa agian. Aurre eginek ñabardura arabiarrak ditu, eta trebe
dabil Laura eldarnio-atmosfera sortzen.
Bigarren balada da Zuretzat,
akustikoa eta abeslariaren ahotsaren edertasuna bistaratzen duena. Arima Galdu Baten Ahotsa sakona da oso,
hasiera lasai eta lirikoetik, bortitzagoetara salto egiten duena. Eta lanari
bukaera duina emateko, Zeren Zain.
Emakumezkoen eta gizonezkoen ahotsen nahasketa ezin hobea da, eta diskoan zehar
atzemango ditugu elementu desberdinak era epikoan uztartzen dituen kantua dugu.
Lan handiaren isla dugu Zeren zain, gauzak ondo egin diren emaitza. Bai
doinuak bai ahotsak bikainak dira, eta garai oparoagoen hastapena ezarri du
diskoak. Ilusioz beteta eta itxaropentsu gaude gipuzkoar koadrila honekin, eta
garai bateko hutsunea asebete baino, goseak utzi gaituelakoan gaude, gehiagoren esperoan.
- Puntuazioa/Score: 8.5/10
- Abestirik onena/ Best song: Zeren Zain.
